بعيداً عن المعتاد
أقدم لكم مجاراة قديمة دارت بيني وبين اخوي وحبيب قلبي الشاعر فيصل الخالد
الرجّال كان مسافر كعادته وانا استوحشت بها الديره من دونه وأرسلت له هالأبيات:-
يافيصل ياولد خالد إذا سافرت .. سفّرنـي
بدونك ما لها الديره بعينـي.. أي أهمّيـه
وانا واثق ثقه عميا بـأن الكـلّ يعذرنـي
إذا فكّرت من شانك أهدّ ارض السعوديّـه
رفيقي أربع وعشرين ساعه .. ولو تدوّرني
تلاقيني معك حتـى لـو انّـي بالعزيزيـّه
ياعالم لعنبو حيّه .. كأن الـدبّ ساحرنـي
أكيد الدبّ ساحرني .. ياعالم لعنبـو حيّـه
احبّه قبل لا اعرْف التميمي وخالد القرنـي
واحبه قبل لا نرقص سوا في حفل ياميّـه
حساوي بقلبه الأبيض وزود الطيب آسرني
وانا ما انلام لو يصبح نصف ربعي حساويّه
عليك الله وامانه بس لا تبطي.. وتذكّرني
وتلقاني على خُـبرك هِنا .. واترقّب الجيّه
محمد
طبعاً الردّ جاني سريع سريع بس كان صدمه
طلع صديقي مايحبـني ويدوّر الفكه
ياعِلّه وش تبي فيني ترى من جـد قاهرني
بوجهي لازقٍ كنّك مُهمّـة شِغل يوميّـه
عمى بعين العدو وش بك عسى ناوي تشاطرني
بكل شي ٍ في هالدنيا .. يابويه روّق شويـّه
زهقت وناوي ٍ أنساك.. لا امرّك ولا تمرْني
كفاك اني عطيتك وجه .. وشرّفتك بردّيـّه
احس انّك على صدري كما الكابوس حاكرني
عجزت اتنفس .. ويمكن تجيني ذبحه صدريّـه
حَوَل.. فاهـي.. ولاتفهم وانا وشوّ يصبرني؟
على عاطل.. على باطل.. ونص ربعه حراميّه
.
.
.
تعال اسمع ترى امزح قسم بالله باهرني
بشعرك يا رفيق الدرب عجزت اكتب انا زيـّه
ولانّك شهري يا محمد فانا ارجوك شهّرني
ولد عمك ومن دمك وابي تخطب لي شهريّـه
فيصل
ليست هناك تعليقات:
إرسال تعليق