حلمت انّي أصير انسـان مستثمـر وكـاش
وشفت طفرة سوق الاسهم قلت: فرصه واسنحَت
ويعني ياخي لي متى؟ وانـا اتحـرّى للمعـاش
خلّ اخشّ السوق غيري ناس خشّت .. واربحَت
خذْت قرض وقمت اضارب فالقيادي والخشـاش
وجا على وجهي انهيار السوق ويدحـدر تحَـت
قلت: يمكن فترة التصحيح .. وتاليهـا انتعـاش
طالـت المـدّه علينـا .. والدراهـم روّحــت
ليتني أقدر أبيع وبعـت .. لـو حتّـى بْبـلاش
البلى انّي ماقدرت وليـت الاسهـم .. صححَـت
كل يوم امرّ اشوف المحفظه حمـرا .. ومـاش
يبدو ان الوضع مُـزري .. والأمانـي إنمحَـت
مابي الاّ راس مالي وتوبـه ماعِدْنـي بخـاش
واضح انّ السوق لعبه .. والهواميـر افلحـت
معظم الشعب السعودي طاح .. والهيئة طنـاش
جتْ على روس الصغار وفلّستهـم .. واذبحَـت
ما كأنّ الوضع إلاّ حلقـه مـن حلقـات طـاش
وشهر فبراير نحسّه شهر مأسـاوي .. بحَـت
إبتلشْنا .. واشهد انّـه كـان شـرّ الابتـلاش
لا القوانين انصفتنـا .. ولا الأمـور توضّحَـت
مالنا ياكود ربّي ثـم ابـو متعـب .. وعـاش
المليك اللي على يـدْه الموازيـن .. ارجحَـت
ننتظر فرض القـرارات السليمـه .. والنقـاش
صلّح فْبعض الأمور .. وبعضهـا مـا تصلحَـت
هذا انا لي حول عام ولايـزال الوضـع مـاش
وحالتـي مثـل المؤشّـر قفّلـت نسبـه تحـت
..
ليست هناك تعليقات:
إرسال تعليق